"پھلاں ورگے ہادے" چوں اشلوک
انیس احمد۔۔۔۔ 15 مئی 2024
کیوں پنجابی ماردا ، ایہ بلوچستان
میں سمجھاں پنجاب ہے، سارا پاکستان
۔۔۔۔۔۔۔۔۔۔۔۔۔
کنٹینر نے لا دئے ، رستے کیتے سیل
دو ہتھاں دی واٹ نوں ، کیتا کنے میل
۔۔۔۔۔۔۔۔۔۔۔۔۔۔۔۔۔
آئرلینڈ وی ٹیم ہے، کھیڈ وکھائی کل
بابراعظم ہاریا، کیہڑی نویں اے گل
۔۔۔۔۔۔۔۔۔۔۔۔۔۔۔۔
ہاکی قومی کھیل ہے ، قوم دے ورگا حال
کدی اے چنگا کھیلدے، کدی اے ماڑی چال
۔۔۔۔۔۔۔۔۔۔۔۔۔۔
پتھر سٹیا اوس نے ، میں ہاں لہو لہان
لہو وے میرے نال دا ، بزدل تے بے جان
۔۔۔۔۔۔۔۔۔۔۔۔۔۔۔۔۔
لیڈر دوہاں پاسیوں ، اگ لگاندے روز
جھلے لوکی کوکدے ، ماراں کھاندے روز
۔۔۔۔۔۔۔۔۔۔۔۔۔۔۔۔
میں وی جیلاں کٹیاں ، دئی سیاست چھڈ
کوئی نہیں حامی دیس دا ، پڑھے لکھے اجڈ
۔۔۔۔۔۔۔۔۔۔۔۔۔
مسلم بنے بریلوی ، دیوبندی تے پیر
وچ حیات ممات دے ، کردے پئے تفسیر
۔۔۔۔۔۔۔۔۔۔۔۔۔۔۔
تختاں اتے بھوتنے، ، نال شریک دیو
کھائی جاندے آدمی ، بولن آدم بو
۔۔۔۔۔۔۔۔۔۔۔
لہسن، ادرک، پودنا ، کھیرا بنے سلاد
دہیں دے رائتے نال میں، کرداں تینوں یاد
۔۔۔۔۔۔۔۔۔۔۔۔۔۔۔
آوی، دے وچ ا گئے ، بھانڈے کچے کار
چاک تے بیٹھا بادشاہ ، لگدا اے کمہیار
۔۔۔۔۔۔۔۔۔
بدلی جس وی ذات ہے، جنت ہوئی حرام
بد ذاتاں دے واسطے ، ایہ دنیا انعام
0 تبصرے